用中國功夫打入荷里活，在美國的鬼佬個個都尊稱他為師傅的甄子丹，拍過無數電影，身經百戰，這次竟視訓練Twins為一件艱辛任務，他說這次出來的效果這麼成功，全靠一樣秘密武器──軟硬兼施!

動作我話晒事

甄子丹大大話話拍了動作電影都有10幾年，親身打又打過，在幕後做導演睇住人打又試過，拍過無數動作電影的他，這次為《千機變》設計的動作場片，其實跟他過往所設計的會不會沒什麼分別?

「我拍動作電影這麼多年，幕前幕後都做過，無論我做演員又好做設計又好，其實細緻到每一場都有唔同，但同時間都會保留番我自己的風格。有時我做武指又好，做導演又好，當你拍攝那個演員時，自己都會投入了那部戲，將個演員變o左問自己，希望演員將我心中的動作演繹出來。」

「咁當然每個演員的能力都參差不齊，例如Twins的功夫底子當然不可能同成龍大哥比啦，而且觀眾睇過大哥好多套動作片，佢亦都有自己的風格，所以拍攝大哥的時候，既要保持番成龍的風格，同時亦要灌輸我的生命入去，個技巧就是這裡。所以你問今次的動作場面同以前有冇分別，其實每個人演繹已經係唔同，因為那些動作是透過唔同人打出來的，已經唔係100%的甄子丹，但同一時間他們係由我在後面操縱他們演繹我的東西，咁所以兩者關係好微妙的。」

伊健脫胎換骨

而在《千機變》中，打得最多的就係伊健、阿Sa及阿嬌這幾個殭屍獵人，個個都話甄子丹設計的動作場面令他們吃不消，真係前所未有咁辛苦。但其實在這位武指兼導演眼中，又覺得這幾位主角表現的如何。

「我處理伊健同Twins係用了不同方法，因為伊健之前拍過好多動作片，好似《風雲》同《中華英雄》，我一開始已經同伊健講，我要你脫胎換骨，如果可以做到這樣就好成功，因為我不想佢帶住一個包袱過來，我要佢將之前覺得東西跟那些演繹方法全部都丟掉，重新再創一個新的形象，咁我覺得佢在這方面好成功。其實由頭到尾觀眾最大的期望都係Twins，Twins點樣去拍動作片?因為擺到明這部戲係以打為主，有冇人信他們可以做得到?個挑戰在這裡，而我就要塑造到他們唔單止俾人感覺真係得，重要令人睇到他們的表現係要好驚嘆的，咁其實我一直壓力都好大，我相信觀眾睇完之後，一定會留低深刻印象。」

對Twins要軟硬兼施

話晒Twins都係2個小妹妹，加上又從未拍過動作片，估無到他們再《千機變》中竟然會有咁好的表現，直情好似變身做打女一樣，相信他們2個今次咁成功，甄子丹呢位武術指導一定居功不小。

「其實我教Twins去拍動作場面，係用了循循善誘同好凶去罵這兩種不同的方法，首先我要跟他們溝通，我要了解他們，要從旁邊去觀察，而他們開始受訓的時候，我有成班助手跟他們玩埋一堆，要他們當這個是一個game，令到他們對動作有興趣先，因為他們沒興趣，你點樣迫都做不好最好的效果，而產生了興趣，就自自然然會俾多12分的努力去完成個訓練。由拍攝的初期開始，有時我會板起塊面，因為始終作為一個導演在現場，係要有自己的威嚴在那裡，如果沒了威嚴的話，有時他們倆個靚妹心散就做唔到件事，咁我那時候就會板起塊面，他們就會更加用心去做。不過他們就不是怕，只是覺得這個導演係好嚴謹，旦夕當他們做的好的時候，我就會拍手鼓勵，或者我見到他們好像失去了少少信心，或者累，就會去同他們溝通下、玩下，令到他們再提起勁。」

「其實他們倆個係有唔同的特質，如果你適當去拍攝同設計，他們拍打戲係有好好的效果，他們倆個都有潛質去做打女，而在《千機變》中，阿嬌的表現是比阿Sa好，所以將個集中力放在阿嬌身上，再加上阿嬌其實係想做這些，阿Sa反而會嫌少少辛苦，綜觀來講他們倆個都好醒目、好叻女。」

最想多謝楊老闆

身兼《千機變》武指集導演的甄子丹，究竟再拍攝過程中會遇到什麼難忘的事同有哪些人最想多謝呢?

「其實日日都有些難忘的事發生，因為每一日在片場都有突發事件，好可能演員做唔到個場面，又或者些機器壞了，每一日都有這些事發生，都要睇你點去處理。其實最開心都係拍Twins戲份，因為兩個靚妹都係一張白紙，點樣去將他們這張白紙畫到成畢卡索這樣拿獎的油畫呢?這個其實係好開心同有好大滿足感，由他們唔識而做到好好，有時我在幕後重興奮過他們，我健他們做得好種會開心到跳起添!」

「最想多謝監製找我回來，亦多謝英皇去鼎力支持，因為一部好的電影，尤其係動作片，真係需要金錢、時間去做，而創作的東西唔單止是個概念，都需要金錢去支持。重要多謝楊老闆，因為佢肯擺咁多錢落去，我們才做到這樣的效果出來，你話如果少點時間同人力物力，都沒有這樣的效果。」

《千機變》絕對可以打入國際市場

甄子丹在荷里活可以話站穩了陣腳，個個鬼佬都會叫佢做甄師傅，以佢在荷理活的拍戲經驗，唔知又對《千機變打入國際市場有幾大信心?同時佢又點睇自己將中國功夫帶到去美國的荷里活，影響荷里活的電影潮流?

「其實《千機變》打入外國市場係冇問題，首先所謂香港式的動作style，已經在全世界好流行，因為我們香港咁多個資深的前輩已經過去荷里活啦，我現在都在荷里活發展，咁證明這個style係帶領緊荷里活電視、電影，甚至卡通的潮流。《千機變》係一部青春動作片，更有晒咁多當紅的演員，又有咁大的投資，在動作方面又花了好多精神同時間，去拍成

一些可以領導荷里活的動作場面，所以成功的元素已經包含在裡面，成功就一定成功，而去度幾高就要由天時、地利去決定。」

「講真，自己完全冇想過將中國功夫帶入荷里活，正如我相信在荷里活發展得這麼好的同行，都冇想過這件事，因為呢種係市場突然間的需求，係機緣巧合。而我又唔敢講話想帶些什麼進荷里活，但我係一個電影愛好者，我想拍些好的電影，無論係荷里活電影或者香港電影，都希望可以保留到我自己的風格，咁我就覺得好滿足。」

後記
街頭文化
傳聞中的甄師傅係一個好cool的人，但小記經過今次的採訪，先知道這位荷里活明星都會同人講笑，並不是想像中那麼惡。而且在拍攝的過程中，佢重教識小記一個美國街頭好流行的手勢，個手勢就係豎起食指、中指及無名指3隻手指，呢個動作就好似用手指做一個英文「w」出來這樣，意思即係whatever，佢的解釋係話無論你面前發生了什麼大件事，都要當佢係好容易解決，唔好將佢睇成咁嚴重，相信甄師傅呢個手勢對而家受SARS及失業問題影響的香港人來講，真係特別有意義。END