甄子丹說，如果有得揀，他會選擇唔做文字專訪，因為電台、電視的訪問，直接了當兼原文照錄，潛台詞是他認為這樣便會減少報章雜誌對他口中所指的不實報導。

有理由相信以上都是他肺腑之言﹗

翻開有關甄子丹的剪報，十居其九都是指他沙塵囂張，特別是自他00年殺入荷里活開始，他多了一個稱號叫「國際武打巨星」，但列明是他自居的，擺明有骨落地。

據 資料顯示，這幾年他從荷里活回流香港拍戲，被他辣火頭的就有黃真真憤然劈炮執導《見習黑玫瑰》，原因是負責武術部分的導演甄子丹處處要話事，更自把自為 刪減她文戲的戲分；然後他在《娛樂直播》訪問中，直指成龍「年紀大、反應慢」，還說與李連杰合作了兩次，都只用兵器對打，希望可以和他以拳腳較量，報紙指 他單挑李連杰。拍《龍虎門》時，又傳他硬搶原本屬意吳彥祖的角色王小龍一角，再使橫手將自己升格為主角，總之是非一籮籮。

拍第一部電影《笑太極》與肥肥合作，肥姐飾演他師父，但其實最打得的是他。

好戲還在後頭﹗

他又狠批電影《滿城盡帶黃金甲》武打場面out，報紙食住上指他明踩資深武指程小東，還有與《龍虎門》的余文樂、《殺破狼》的任達華、《導火線》的葉偉信、古天樂都傳有過節，部部戲不是傳與人不和，便是指他扮大哥獨攬大權，刪走別人戲分來抬高自己，導火指數是藝人中之冠。

這天甄子丹因要為新片《導火線》宣傳，無可避免的接受雜誌專訪，一直和靄可親、笑容可掬的他，面對擺在眼前的負面新聞資料，他有點用力的說：「全是不實報導」。

根據多間不同報章雜誌對甄子丹的報道所得結論，假使全部都是失實報道，現年43歲隨時一拳打低幾件的他，一直低調回應，只在訪問中呻幾句，都算忍得。

寸得起

18歲時，得袁和平賞識帶他入行，與袁一直是師徒關係，久不久便會通一次電話。（左一是當年叫上山安娜的上山詩納）

香港地很現實，寸、囂張這等攻擊力強的形容詞，不是人人受得起，像陶傑話齋，寸人都要有理，當然更多人無的放矢，冇料扮代表，狂妄自大得把口，這是最低層次 的無理取鬧；人人得而誅之；然而有料又寸的人，雖然攻擊力強咄咄逼人，但又吹你唔脹，亦即是陶傑所說寸得有道理，有時還會暗地裏寫個服字；當然最高章是有 料但又做到謙厚自重的，固然贏盡口碑。

甄子丹於00年到荷里活 拍了首部電影《挑戰者之終極爭霸》，然後留在那裏發展，不單做演員也做武術動作指導，01年Miramax更購入他93年的作品《鐵馬騮》在美國搬上大銀 幕，一部舊片竟也收千五萬美金，更重要是他的名字在美國觀眾心中烙下了印，打出名堂；曾被美國《People》雜誌選他為五十大最炙手可熱的王老五。又登 上電影權威雜誌《Movieline》封面，Donnie Yen在美國真的有價有巿。

在荷里活響朵再回流返港拍動作電影做武指，絕對寸得起，只不過被外界統一口徑數落，難免令人覺得甄子丹真係一個麻煩友。

剛出道時跳跳紮，甚得杜麗莎愛錫。

「我 從來都無去表達過自己有幾了不起，（係咪你嘅言行令人誤會？）我又唔覺得喎﹗（覺唔覺得自己好惹火？）我一啲都唔惹火，首先點解你會覺得我惹火先？（好多 報道指你同人不和，例如成龍？）成龍無可能啦，所有報導我敢講十個有九個都係錯回應，如果你因為呢報導而問我回應，我好難因為傳媒自己寫嘅嘢去表達意 見。

可能我由細至大都練功夫，好細個已經喺功夫上得到一成 就，加上我入行後拍動作電影又做武術指導都不斷俾到一種優越感自己，我性格又好反叛，你話我唔得我就一定做到得為止，嗰種鬥心帶俾我一種推動力，可能久 而久之會將自信形於外，外人會覺得係囂張，當然最好就係可以做到最高境界，有料但又謙厚內斂啦，但我覺得自己都開始進入呢個階段。

我 答唔到你點解人要寫我寸同囂，我真係唔知，有時一句說話，記者寫出嚟嘅語氣，可以令到意思唔同晒，你睇以往我做有線、無線嘅訪問，同一個訪問，但電視播出嚟從來都無問題，但經文字寫出嚟係完全兩回事，你問我點解啲記者咁寫，我唯一可以假設係為咗銷量，而我一向比人感覺係cool，寫不和咪最順理成章 囉，我已經習慣咗俾人炒作新聞。

甄子丹回流返港拍戲，與黃百鳴一口氣以三千萬簽三部片約，片酬高達一千萬。

其實有段時間我真係好抗拒，因為唔係事實嘛，我又無做錯嘢。但我承認自己唔係一個易相處嘅人，因為我性格唔係好合群，有時我無心，諗緊就唔記得同人打招呼，又或者自己唔出聲時，人哋又會覺得我寸。」

導出火

的而且確，甄子丹的形象囂張又寸爆，特別是在荷里活回來後，更添一宗住雞毛當令箭的罪名，傳拍《龍虎門》時，身為武術導演的他明搶吳彥祖飾演王小龍的角色，又指《導火線》為了自己角色突出，刪剪古天樂的戲分，單單新聞都深化他的負面形像。

甄子丹拍《殺破狼》時，就傳過與任達華不咬弦。

「你提起我又想講《龍虎門》，反正我無行出澄清過，之前一直傳我搶咗吳彥祖個角色嚟做，根本就無呢件事，我重有個劇本度，劇本係當時黃百鳴同黃玉郎搵我 演呢套戲時親手交俾我，佢哋一心就係搵我做王小龍個角色，如果我只係作為《龍》片嘅武術指導，我點樣可以搶到一個演員嘅角色嚟做，搵我做呢個角色亦係巿 場需要，傳完我搶角色，到拍《導火線》時又傳我刻意減人戲分，其實《導火線》入面，最初我係有條愛情線，係我自己要求刪呢part，我係刪人戲，不過係 cut咗自己嘅戲，而且我亦無權去刪減其他演員戲分，呢係導演事。

但 如果係武術動作設計方面，我係百分百有自己嘅原則，你認為霸道都好啦，呢個係我要求，我一定係為部戲行先，大家有目共睹，有邊個喺我武術指導下出嚟嘅效果差？譬如我拍阿Sa阿嬌，我真係拍到佢哋ok喎，我拍謝霆鋒、余文樂出嚟，係咪大家都覺得佢哋好打得先，我拍吳京，係咪拍《殺破狼》之後都對佢另眼相看咗，如果我真係要欺負演員嘅話，我唔需要俾佢發揮，全部都我手上，講句難聽，我全部剪晒佢都得啦。所以我自己睇，我對得住部戲，對得住大家有餘，我已經做最公 正本分。」

在荷里活走一轉返港後，即憑《殺破狼》奪得第25屆香港電影金像獎「最佳動作設計」獎，果然不同凡響。

你本身係咪一個好有自信嘅人？

唔‥‥‥ （想了10秒）點解我要諗咁耐先答覆你，因為自信好容易俾人解釋為自大，曾經一段時間，我都覺得自己幾自大，但呢個係每個人都會經歷過學習期，你話我而 家重有冇嗰種自信，我絕對有，但唔覺得而家嘅我係自大。或者我以前真係迷失過，但人係會成長，我都成長咗好耐啦。

千萬片酬

甄子丹生於小康之家，自小在藝術與武術的氛圍下成長。母親麥寶嬋是女高音，又是著名武術和太極宗師，創辦了武術研究所，自小在母親栽培下練武的他，身手不凡；父親是波士頓《星島》的編輯，擅長小提琴演奏，他也彈得一手好鋼琴，由細至大沒有捱過苦。

「我 未試過真真正正生活上遇到困難，最困難算係自己投資拍戲嗰段時間，自己開拍《戰狼傳說》同《殺殺人、跳跳舞》，點知碰九七，損晒手，嗰時為自己理想 做導演，我推好多戲，當年我已經一百萬片酬，王晶都簽我三部戲，落晒訂，但都未拍完一部，我已經退番訂俾佢，因為我覺得大家方向唔係好同，段時 間我都推有十部八部戲，點知遇金融風暴，自己投資電影賠幾百萬，但推戲都無咗成千萬收入，一來一回真係有啲肉赤，但係塞翁失馬、焉知非福，就係因為 環境好困難，製作一部電影嘅每個程序，由執頭執尾到配樂、剪接都一腳踢，反而係一個磨練機會，俾我學習點去做一個導演，做一個製作人。」

10年前收一百萬片酬，家幾多錢一部？五百萬？

呢個問題我答你，你又會話我自大，總之就一定高過嗰時好多，五百萬？咁又唔止。（據知，甄子丹以三千萬元與黃百鳴簽了三部片約，一部片酬足有一千萬。）

放眼國際

甄子丹雖然在波士頓長大，但香港才是他拍電影起步的地方，以一個華人武者由香港打到去美國，再在國際揚名，絕對不是易事，的而且確，Donnie Yen這個名，在外國電影圈還有點影響力。

「有我參與電影國際上有一定號召，好似《導火線》已經排咗喺美國上映，對一套港產片來說唔係易事，甄子丹嘅動作片，無論我係演員定係動作指導，都有巿場價值」反觀香港，單單看甄子丹的報道幾乎無單好嘢，就知隔籬飯香心理原來係世界通行。

最緊要靚

當甄子丹的專訪確定時間日期後，接到公關的電話，指明要借LV、Gucci或DandG的衣服，事前看過有關甄子丹的報道，立即在腦內浮現滿身名牌兼大支的甄子丹，故記者早有心理準備要面對一個不易招呼的被訪者。

豈料這天準時現身的甄子丹，說話溫文，和顏悅色，就算記者一而再再而三問到有關他的負面報道，最多帶點愕然講句「，你咁問我。」

甄子丹讓人感到意外的，還有一樣，就是好貪靚。他以功夫揚名，以打見稱，但身為一介武夫的他，對衣服鞋襪外型全都講究得很，影相做訪問，髮型化妝貼身服侍。

「點解學功夫唔可以企企理理，我都係一個演員，我一樣尊重呢個身分，而且要改變大家呢個觀念，學武之人都可以貪靚；基本上我好鍾意靚嘅，所以拍戲對每個鏡頭的要求好嚴格，都係因為我愛靚之故。」

貪靚無罪，只是眼前又浮起有關他的報道，才發覺先入為主的殺傷力先至得人驚。